हिमपातले गर्दा डोल्पाको हवाई सेवा, विद्युत र सञ्चार सुविधा प्रभावित

काठमाडौंः मंगलबार बिहानदेखि मौसममा बदली आउँदा परेको झरी तथा हिमपातका कारण डोल्पाको हवाई सेवा, विद्युत र सञ्चार सुविधा प्रभावित भएको छ । सदरमुकाम दुनैका स्थानीय सरोज ओलीका अनुसार मंगलबारदेखि जुफाल विमानस्थलबाट उडान हुन सकिरहेको छैन भने विद्युत र टेलिफोन सुविधा पनि अनियमित भएको छ ।

डोल्पाका अधिकांश भूभागमा भइरहेको हिमपात बुधबार पनि जारी रहेको र पानी पर्न केही कम भए पनि चिसो भने अत्याधिक बढेको ओलीले जानकारी दिए । लामो खडेरीलाई चिर्दै हिउँदे झरी पर्दा कृषि र पशुपालनका लागि फाइदा हुने भए पनि चिसो बढ्दा भने जनजीवन प्रभावित भएको छ ।