तामाङ राष्ट्रिय पुस्तकालयको प्रथम वार्षिक उत्सव कार्यक्रम सम्पन्न

काठमाडौंः तामाङ राष्ट्रिय पुस्तकालयको प्रथम वार्षिक उत्सव कार्यक्रम काठमाडौंको बौद्धमा आज सम्पन्न भएको छ । स्थापनाकोे एक वर्ष पुरा भएको अवसरमा उक्त कार्यक्रमको आयोजना गरिएको हो । कार्यक्रममा पुस्तकालयको वार्षिक विवरणहरु प्रस्तुत गरिएको थियो भने सहयोग गर्ने व्यक्ती तथा संस्थाहरुलाई सम्मानपत्र समेत प्रदान गरिएको थियो ।

कार्यक्रममा सम्बोधन गर्दै पुस्तकालय संचालक समितिका अध्यक्ष अमृत योञ्जनले तामाङ समुदायको पनि राष्ट्रिय स्तरको पुस्तकालयको आवश्यकता महसुस भएकाले र तामाङ भाषाका सामग्रीहरुलाई संकलन एवं व्यवस्थित गर्ने उद्धेश्यले तामाङ राष्ट्रिय पुस्तकालयको स्थापना गरिएको बताए । `तामाङ डाजाङ, तामाङ न्हाङखोर, तामाङ घेदुङ लगायतका संस्था र बौद्धिक व्यक्तित्वहरु बसेर छलफल गर्दा तामाङ समुदायको पनि पुस्तकालयको आवश्यकता महसुस भयो´, उनले भने, `स्थापना हुनुको मुख्य उद्धेश्य तामाङ भाषाका सामग्रीहरुलाई संकलन एवं व्यवस्थित गर्नु नै हो।´

कार्यक्रममा तामाङ राष्ट्रिय पुस्तकालय संचालक समितिका अध्यक्ष अमृत योञ्जन,काठमाडौं क्षेत्र नं ३ का नवनिर्वाचित प्रतिनिधि सभा सदस्य सन्तोष चालिसे,क्षेत्र नं ३ प्रदेशसभा क का सांसद छिरिङ दोर्जे लामा,जापानका लागि पुर्व राजदुत डा.गणेश योञ्जन,तामाङ डाजाङका अध्यक्ष फुलकुमार बोम्जन,भाषा आयोगका कार्यवाहक अध्यक्ष उषा हमाल लगायत विभिन्न व्यक्तित्वहरुको उपस्थिति रहेको थियो ।