February 26, 2026, Thursday
२०८२ फाल्गुन १४
Nepal 1:37:26 pm
सत्य र तथ्यको खोजी यात्रा
थाहा संवाददाता काठमाडौंः संसद बाहिरका चार कम्युनिस्ट पार्टीहरुले पार्टी एकता एवं क्रान्तिकारी ध्रुवीकरणका निम्ति छलफल गर्ने र संयुक्त मोर्चालाई थप व्यवस्थित गर्ने निर्णय गरेको छ । आज विप्लव नेतृत्वको नेपाल कम्युनिस्ट पार्टीको केन्द्रीय कार्यालयमा बसेको चार कम्युनिस्ट पार्टीको बैठकले उक्त निर्णय गरेको हो । शुक्रबार विप्लव महासचिव रहेको नेपाल कम्युनिस्ट पार्टी,आहुती महासचिव रहेको वैज्ञानिक समाजवादी कम्युनिस्ट पार्टी,नेपाल,ऋषि कट्टेल अध्यक्ष रहेको नेपाल कम्युनिस्ट पार्टी र कर्णजित बुढाथोकी अध्यक्ष रहेको नेकपा माओवादी समाजवादी पार्टीका बीचमा उक्त बैठक भएको हो ।
चार पार्टीको बैठकले एक संयुक्त प्रेस विज्ञप्ति जारी गर्दै देशको वर्तमान राजनैतिक अवस्थाको विश्लेषण गर्दा सबै स्थिति चरम संकट र गम्भीर अवस्थामा रहेको निष्कर्ष निकालिएको जनाएको छ । त्यस्तै उक्त विज्ञप्तिमा पार्टी एकता,संयुक्त मोर्चा र कार्यगत एकताको ठोस कार्यक्रम विकास गरी सार्वजनिक गर्न आगामी फागुन १५ मा पुनः चार पार्टीको बैठक बस्ने उल्लेख गरिएको छ । यसअघिदेखि नै यी चार पार्टीहरु संयुक्त रुपमा विभिन्न आन्दोलनहरु गर्दै आइरहेका छन् ।
